自修室

喺自修室裡面,一個少女遭狂徒非禮,於是大嗌:「非禮呀!」

同學A:「自修室係俾人專心溫書嘅地方,唔容許任何人破壞安靜!無論發生咩事都唔可以大聲講嘢,騷擾其他人!」

同學B:「我知道你有大聲求救嘅自由,但你有冇諗過會影響到人?我都有安靜溫書嘅自由喎!你覺唔覺自己好自私?」

同學C:「你知唔知,你咁樣大嗌,騷擾到大家溫書,大家成績會差咗幾多?成績差咗,將來搵唔到好工,損失幾多錢你知唔知?點解你一個人要大聲求救,我哋幾十個人要同你埋單?」

同學D:「個女仔染咗頭髮,條熱褲又鬼死咁短,都唔似係讀書樣,都唔知係咪借啲椅喺度搞事啫!」

同學E:「嗌非禮有鬼用咩,之前試過幾次有女仔嗌非禮都捉唔到個變態佬,仲嗌嚟做乜?哂氣啦。無論做咩之前都要諗吓有冇用至得架。有啲嘢,係做唔到就做唔到。」

同學F(普通話):「我看,她就是別有用心的。聽說有人看到她和附近國際學校的學生乘同一輛巴士上學,應該是收了那邊學生的錢,在我們這裡尋釁滋事,破壞秩序,拖低我們的成績吧!」

呢個時候,大家發現非禮狂徒其實係自修室管理員。佢收起猥瑣嘴臉,一本正經咁話:「我相信大部分自修室使用者都唔會認同大聲講嘢嘅行為。我呼籲各位無論要表達咩嘢訊息,都要遵守自修室嘅守則,細細聲講,唔好滋擾他人。安靜有秩序嘅形象,係我哋自修室運作多年嘅基石。呢位同學,我理解你嘅訴求,但亦懇請你以自修室整體利益著想,唔好再作出大聲喧嘩嘅違規行為,等自修室嘅公共秩序得以恢復。」

沉默嘅大多數望吓受害少女,又望吓同學A至F,再望吓一本正經嘅管理員。見佢哋各執一詞,都唔知聽邊個講好。不過,無論發生咩事,反正「太陽如常升起」;反正自修室都係會一直開落去,都係唔好理咁多,專心溫書。

於是大家不再理會受害少女,繼續溫書。管理員重現猥瑣嘴臉,望住自修室裡面清一色嘅女學生,尋找下一個獵物……

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s